ಯಲ್ಲಾಪುರ: ಸಾಮಾನ್ಯವಾಗಿ ಹುಟ್ಟುಹಬ್ಬವೆಂದರೆ ಸ್ನೇಹಿತರು ಹಾಗೂ ಕುಟುಂಬದವರೊಂದಿಗೆ ಸೇರಿ ಕೇಕ್ ಕತ್ತರಿಸಿ ಅದ್ದೂರಿಯಾಗಿ ಆಚರಿಸುವುದು ಇಂದಿನ ಟ್ರೆಂಡ್. ಆದರೆ, ಜಿಲ್ಲೆಯ ಯಲ್ಲಾಪುರದ 13 ವರ್ಷದ ಬಾಲಕಿ ಲಾವಣ್ಯ ನಾಗರಾಜ್ ನಾಯ್ಕ ತನ್ನ ಹುಟ್ಟುಹಬ್ಬವನ್ನು ಅನಾಥಾಶ್ರಮದ ನಿವಾಸಿಗಳೊಂದಿಗೆ ಆಚರಿಸುವ ಮೂಲಕ ಸಮಾಜಕ್ಕೆ ಅತ್ಯುತ್ತಮ ಮಾದರಿಯಾಗಿದ್ದಾಳೆ.
ಯಲ್ಲಾಪುರದ ನಾಗರಾಜ ನಾಯ್ಕ ಅವರ ಪುತ್ರಿಯಾಗಿರುವ ಲಾವಣ್ಯ, ಗುರುವಾರ ತನ್ನ ಜನ್ಮದಿನದ ಅಂಗವಾಗಿ ಪಟ್ಟಣದಿಂದ ಸುಮಾರು ಅರ್ಧ ಕಿಲೋಮೀಟರ್ ದೂರದಲ್ಲಿರುವ ಅನಾಥಾಶ್ರಮಕ್ಕೆ ಭೇಟಿ ನೀಡಿದ್ದಳು. ತನ್ನ ಹುಟ್ಟುಹಬ್ಬದ ಸಂಭ್ರಮವನ್ನು ಇಮ್ಮಡಿಗೊಳಿಸಲು ಆಶ್ರಮದಲ್ಲಿದ್ದವರಿಗೆ ಸೀರಾ ಹಾಗೂ ವಿವಿಧ ಸಿಹಿತಿಂಡಿಗಳನ್ನು ವಿತರಿಸಿ, ಅವರೊಂದಿಗೆ ಕೆಲಕಾಲ ಬೆರೆತು ಸಂತಸ ಹಂಚಿಕೊಂಡಿದ್ದಾಳೆ.
ಕೇವಲ ತನ್ನ ಹಾಗೂ ತನ್ನ ಸ್ನೇಹಿತರ ಸಂತೋಷಕ್ಕೆ ಮಾತ್ರ ಸೀಮಿತವಾಗಬಹುದಾದ ದಿನವನ್ನು ಇತರರ ಮುಖದಲ್ಲಿ ನಗು ಮೂಡಿಸಲು ಬಳಸಿಕೊಂಡ ಈ ಬಾಲಕಿಯ ಕಾರ್ಯವು ಎಲ್ಲರ ವಿಶೇಷ ಗಮನ ಸೆಳೆದಿದೆ.
ಈ ಅನಾಥಾಶ್ರಮದಲ್ಲಿ ಒಟ್ಟು 45ಕ್ಕೂ ಹೆಚ್ಚು ಮಂದಿ ವಾಸವಾಗಿದ್ದು, ಅವರಲ್ಲಿ 22 ಸಣ್ಣ ಮಕ್ಕಳ ಜೊತೆಗೆ ಹಲವಾರು ವಯೋವೃದ್ಧರು ಸಹ ಆಶ್ರಯ ಪಡೆದಿದ್ದಾರೆ. ಕುಟುಂಬದ ಆಸರೆಯಿಲ್ಲದ ಈ ನಿರ್ಗತಿಕರೊಂದಿಗೆ ಬೆರೆತು, ‘ಸಂತೋಷವನ್ನು ಹಂಚಿಕೊಂಡಾಗ ಅದು ಮತ್ತಷ್ಟು ಹೆಚ್ಚುತ್ತದೆ’ ಎಂಬ ಸುಂದರ ಸಂದೇಶವನ್ನು ಈಕೆ ಸಾರಿದ್ದಾಳೆ.
ಎಳೆಯ ವಯಸ್ಸಿನಲ್ಲಿಯೇ ಇಂತಹ ಅಪರೂಪದ ಸಾಮಾಜಿಕ ಕಾಳಜಿ ಹಾಗೂ ಮಾನವೀಯತೆ ಬೆಳೆಸಿಕೊಂಡಿರುವ ಲಾವಣ್ಯಳ ಈ ಅರ್ಥಪೂರ್ಣ ಆಚರಣೆಗೆ ಅವಳ ಕುಟುಂಬಸ್ಥರು, ಸ್ನೇಹಿತರು ಮತ್ತು ಸ್ಥಳೀಯರು ಮುಕ್ತಕಂಠದಿಂದ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
