ಅಂಕೋಲಾ: ತಾಲೂಕಿನ ಹಾರವಾಡ ಗಾಬಿತ್ವಾಡ ಸಮೀಪದ ಅರಬ್ಬಿ ಸಮುದ್ರದಲ್ಲಿ ದುರಂತವೊಂದು ಸಂಭವಿಸಿದ್ದು, ದೋಣಿ ಮುಳುಗಿ ಮೀನುಗಾರರೊಬ್ಬರು ಜಲಸಮಾಧಿಯಾಗಿದ್ದಾರೆ. ಮೃ*ತ ಮೀನುಗಾರನನ್ನು ಹಾರವಾಡ ಗಾಬಿತ್ವಾಡ ಗ್ರಾಮದ ನಿವಾಸಿ, 50 ವರ್ಷದ ಸಹದೇವ (ರಾಜೇಶ್) ಮೆಥಾ ಎಂದು ಗುರುತಿಸಲಾಗಿದೆ.
‘ಶ್ರೀ ಮಾತಾ ಭವಾನಿ’ ದೋಣಿಯಲ್ಲಿ ತೆರಳಿದ್ದಾಗ ಅವಘಡ
ಮೀನುಗಾರಿಕೆಯನ್ನೇ ತಮ್ಮ ಬದುಕಿನ ಆಧಾರವನ್ನಾಗಿ ನಂಬಿಕೊಂಡಿದ್ದ ಸಹದೇವ ಅವರು, ಎಂದಿನಂತೆ ತಮ್ಮ ದೈನಂದಿನ ಕಾಯಕಕ್ಕಾಗಿ ‘ಶ್ರೀ ಮಾತಾ ಭವಾನಿ’ ಹೆಸರಿನ ದೋಣಿಯಲ್ಲಿ ಸಮುದ್ರಕ್ಕೆ ಇಳಿದಿದ್ದರು. ಆದರೆ, ಅರಬ್ಬಿ ಸಮುದ್ರದ ಮಧ್ಯೆ ಅನಿರೀಕ್ಷಿತವಾಗಿ ದೋಣಿ ಅಪಘಾತಕ್ಕೀಡಾಗಿ ನೀರಿನಲ್ಲಿ ಮುಳುಗಿದೆ. ದೋಣಿಯಲ್ಲಿದ್ದ ಸಹದೇವ ಅವರು ನೀರಿನಲ್ಲಿ ಮುಳುಗಿ ದಾರುಣವಾಗಿ ಸಾ*ವನ್ನಪ್ಪಿದ್ದಾರೆ.
ದಡಕ್ಕೆ ತರುವಷ್ಟರಲ್ಲಿ ಪ್ರಾಣಪಕ್ಷಿ ಹಾರಿತ್ತು
ಸಮುದ್ರದಲ್ಲಿ ದೋಣಿ ಮುಳುಗುತ್ತಿರುವ ಮಾಹಿತಿ ತಿಳಿದ ತಕ್ಷಣವೇ, ಅಕ್ಕಪಕ್ಕದಲ್ಲಿದ್ದ ಇತರ ಮೀನುಗಾರರು ತಕ್ಷಣ ರಕ್ಷಣಾ ಕಾರ್ಯಾಚರಣೆ ನಡೆಸಿ ಸಹದೇವ ಅವರನ್ನು ನೀರಿನಿಂದ ಹೊರತೆಗೆದು ದಡಕ್ಕೆ ತಂದಿದ್ದಾರೆ. ಆದರೆ, ದುರದೃಷ್ಟವಶಾತ್ ಅಷ್ಟರಲ್ಲಾಗಲೇ ಅವರು ಕೊನೆಯುಸಿರೆಳೆದಿದ್ದರು. ಈ ಅನಿರೀಕ್ಷಿತ ದುರಂತದಿಂದಾಗಿ ಹಾರವಾಡ ಗಾಬಿತ್ವಾಡ ಗ್ರಾಮದಲ್ಲಿ ತೀವ್ರ ಶೋಕದ ವಾತಾವರಣ ನಿರ್ಮಾಣವಾಗಿದ್ದು, ಮೃತರ ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದೆ.
